پیش لفظ
سرکاری وغیر سرکاری اداروں میں قومی زبان کے نفاذ کی راہ ہموار کرنے کے لیے اب تک مقتدرہ کی طرف سے خاصا مواد شائع کیا جا چکا ہے قومی شعور رکھنے والے حلقوں میں جس کا خیر مقدم کیا جا رہا ہے۔ زیر نظر کتاب قانونی دستاویز نویسی اصول اور نمونے اسی سلسلہ اشاعت کی ایک کڑی ہے جس کا تعلق قانون، عدالت اور ہماری روزمرہ کی زندگی سے ہے۔
اس کتاب کو جناب محمد عطاء اللہ خان نے بڑی محنت اور توجہ سے مرتب کیا ہے جس میں کوشش کی گئی ہے کہ دستاویز نویسی سے متعلق ہر قسم کے نمونے یک جا کر دیے جائیں ۔ اس کے لیے صرف دستیاب مصادر ہی سے استفادہ نہیں کیا گیا ہے بلکہ کاوش کرکے ایسے نمو نے بھی فراہم کیےگئے ہیں جو مقداروں کتابوں میں نہیں ملتے، جیسے حق تصنیف ، تقررئ ملازم ، رسیدات وصولیابی وغیرہ. اس طرح وثائق اور دستاویزات کے سینکڑوں نمو نے اس مجموعے میں شامل ہو گئے ہیں اور اس کتاب کا سب سے بڑا امتیازی وصف اس کی یہی جامعیت ہے ۔ اس کا ایک اور مابہ الامتیاز یہ ہے کہ اس کی زبان اور اسلوب عصر حاضر کے تقاضوں کے مطابق سہل اور عام فہم ہے ۔ ایک عام آدمی جو معمولی نوشت و خواند سے واقف ہو اس کتاب کی مرد سے چھٹی بڑی ہرقسم کی دستاویز خود تیار کر سکتا ہے۔
اس کتاب میں محض نمونے جمع کرنے پر اکتفا نہیں کیا گیا ہے بلکہ ہر قسم کے نمونوں کے ساتھ رائج الوقت قانون کی ایسی بنیادی و اصولی باتیں بھی درج کر دی گئی ہیں جن سے دستاویز کی حدود متعین ہوتی ہیں اور مختلف قسم کی دستاویزات کا باہمی فرق واضح ہوتا ہے۔ عملی نمونہ جات درج کرنے سے پہلے دستاویز کی تعریف دستاویز کی اقسام، دستاویز کے اجزائے ترکیبی، دستاویز کی زبان کے علاوہ دستاویز نویسی کافن، دستاویز نویسی کی تاریخ جیسے نکات پر نظری حبثیں شامل کرنے سے کتاب کی حیثیت علمی ہو گئی ہے اور وہ محض مجموعہؑ نمونہ جات نہیں رہی۔
زبان کے ساتھ اصطلاحات کو بھی سہل بنانے کی کوشش کی گئی ہے اور مزید سہولت کے لیے انگریزی اصطلاحات بھی ساتھ ساتھ دے دی گئی ہیں۔
دستاویز نویسی کے موضوع پر یہ کتاب یقیناً اس نوع کی دوسری کتابوں سے بے نیاز کر دے گی اور زیریں عدالتوں کی ضرورت کو بطریق احسن پورا کرے گی جہاں کارروائی عام طور پر اُردو میں ہوتی ہے ۔ یہ کتاب عام پیک کے علاوہ دکلاء ، وثیقہ نویسوں اور قانون کے طلبا کے لیے یکساں کار آمد ہوگی، خصوصیت سے اس کا پہلا حصہ جو نظری مباحث پر مشتمل ہے طلبا ہی کی ضرورت کو مدنظر رکھ کر لکھا گیا ہے۔ ہمیں امید ہے کہ یہ کتاب عدالتی لٹریچر میں ایک مفید اضافہ ثابت ہوگی ۔ وزارت قانون کے افسر ترجمہ محمدمعین الدین خان نے اس کی نظر ثانی کی ہے جو موجب طمانیت ہے۔

ڈاکٹر جمیل جالبی